wrapper

Хабарҳо

БАРГУЗОРИИ VII – УМИН КОНФЕРЕНСИЯИ БАЙНАЛМИЛАЛИИ ИЛМИЮ АМАЛИИ “НАҚШИ ОЛИМОНИ ҶАВОН ДАР РУШДИ ИЛМ, ИННОВАТСИЯ ВА ТЕХНОЛОГИЯ”

  VII – умин конференсияи байналмилалии илмию амалии “Нақши олимони ҷавон дар рушди илм, инноватсия ва технология” бо ташаббуси Шӯрои олимони ҷавони Академияи миллии илмҳои Тоҷикистон дар санаи 7 – уми декабри соли 2022 бо иштироки Президенти Академияи миллии илмҳои Тоҷикистон академик Фарҳод Раҳимӣ, раиси Шӯрои олимони ҷавони Академияи миллии илмҳои Тоҷикистон Мамадюсуфова Мену, раисони Шӯрои олимони ҷавони Академияи илмҳои Ҷумҳуриҳои узви Иттиҳоди Давлатҳои Мустақил, аз ҷумла намояндагон аз Ҷумҳурии Қазоқистон, Ҷумҳурии Арманистон, Ҷумҳурии Ӯзбекистон, Федератсияи Россия ва инчунин дигар олимону муҳаққиқонои ҷавони дохилию хориҷӣ, ки дар Институти Геологияи Академияи миллии илмҳои Тоҷикистон баргузор гардид, иштирок доштанд. Муфассал ...
Хондан 7 маротиба
Баҳодиҳии мавод
(0 Овозҳо)

ОЗМУН БАРОИ ИШҒОЛИ ВАЗИФАҲОИ ХОЛӢ

  ИНСТИТУТИ ОМӮЗИШИ МАСЪАЛАҲОИ ДАВЛАТҲОИ ОСИЁ ВА АВРУПОИ АКАДЕМИЯИ МИЛЛИИ ИЛМҲОИ ТОҶИКИСТОН БАРОИ ИШҒОЛИ ҶОЙҲОИ КОРИИ ХОЛӢ ОЗМУН ЭЪЛОН МЕНАМОЯД:
  ОЗМУН БАРОИ ИШҒОЛИ ВАЗИФАҲОИ ХОЛӢ
 
  Шуъбаи Осиёи Ҷанубӣ ва Шарқӣ
  1. Мудири шуъба – 1 ҷой;
  2. Сарходими илмӣ – 2 ҷой;
  3. Ходими пешбари илмӣ – 1 ҷой;
  4. Ходими калони илмӣ – 1 ҷой;
  5. Ходими илмӣ – 1 ҷой;
 
  Шуъбаи Осиёи Марказӣ
  1. Мудири шуъба – 1 ҷой;
  2. Ходими калони илмӣ – 1 ҷой;
 
  Шуъбаи Аврупо ва Америка
  1. Мудири шуъба – 1 ҷой;
  2. Ходими калони илмӣ – 1 ҷой;
  3. Ходими илмӣ – 1 ҷой;
  4. Ходими хурди илмӣ – 2 ҷой;
 
  Шуъбаи Шарқи Миёна ва Наздик
  1. Мудири шуъба – 1 ҷой;
  2. Ходими хурди илмӣ – 2 ҷой.
 
  Талаботи тахассусӣ барои довталабон:
  Дар озмун барои ишғол намудани вазифаи холии сарходими илмӣ – шахсоне, ки дараҷаи илмии доктори илм ва доктор ҳабилитат доранд, иштирок карда метавонанд; ба вазифаи ходими пешбари илмӣ – шахсоне, ки дорои дараҷаи илмии доктори илм, доктор ҳабилитат, номзади илм ва доктор PhD – аз рӯи ихтисос, ки на камтар аз 5 (панҷ) сол собиқаи кории илмӣ доранд; ба вазифаи ходими калони илмӣ – шахсоне, ки дорои дараҷаи илмии доктори илм, доктор ҳабилитат, номзади илм ва доктор PhD – аз рӯи ихтисос ва ба таври истисно кормандоне, ки дар Академияи миллии илмҳои Тоҷикистон на кам аз даҳ сол собиқаи кории илмӣ доранд; ба вазифаи ходими илмӣ – шахсоне, ки номзади илм ва доктор PhD – аз рӯи ихтисос ва шахсоне, ки дорои маълумоти олии касбӣ ва ҳадди аққали собиқаи кории илмӣ на кам аз 3 (се) сол дошта бошад; ба вазифаи ходими хурди илмӣ – шахсоне, ки номзади илм ва доктор PhD – аз рӯи ихтисос ва шахсоне, ки маълумоти олии касбӣ (магистр ё мутахассис) ва лаёқати пеш бурдани корҳои илмӣ-таҳқиқотӣ доранд.
  Инчунин донистани яке аз забонҳои хориҷӣ, аз ҷумла итолиёӣ, испанӣ, индонезӣ, даниягӣ, кореягӣ, ҷопонӣ ва хитоӣ ҳатмӣ мебошад.
 
  Барои озмун
ҳуҷҷатҳои зерин пешниҳод карда мешаванд:
  • ариза ба унвони роҳбари Институт;
  • варақаи шахсӣ (бо дасти худ пуркарда) бо 4 дона расми 3х4;
  • тарҷумаи ҳол;
  • нусхаи шиноснома;
  • нусхаи ҳуҷҷатҳо (диплом) дар бораи таҳсилот ва унвони илмӣ;
  • маълумотномаи тиббӣ (шакли 038 УЕ);
  • дафтарчаи меҳнатӣ;
  • варақаи ҷои истиқомат;
  • маълумотнома дар бораи доғи судӣ;
  • папка-файл;
  • маълумотнома (CV);
  • СИН ва РМА
  Муҳлати қабули ҳуҷҷатҳо - 21 рӯз  баъди нашри эълон дар матбуоти даврӣ.
 
Телефон барои тамос:  221-03-40, 987-66-57-37.
Муфассал ...
Хондан 37 маротиба
Баҳодиҳии мавод
(0 Овозҳо)

Ба муносибати ҷашни алмосии зодрӯзи 75

  Дар бораи инсони фозил, арабшиноси варзида устод Тоҷиддин Мардонӣ сухан бо наср гуфтан соатҳо ва соатҳо лозим меояд. Аз ин хотир, мо суханро дар васфи Устод дар қолаби ин шеъри арабӣ мухтасар кардем:
 
إلى الدكتور تاج الدين مرداني
في يوبيله الماسي الـ 75
 
فَتىً لَهُ فَضَائِلُ إنْ جَدَّتْ وإنْ قَدُمَتْ
بِهَا تَرَقَّى سُلَّمَ المَجْدِ، فَاقَ سِوَاهْ.
ومَا انْتَظَمَ في سِلْكٍ لِدِبْلومَاسيَّةٍ أَمَداً
إلاَّ علَىَ مَنْبَتٍ خِصْبٍ فَبِالعِلْمِ رَوَاهْ.
وتِيجَانٌ زَانَتْ رُؤُوساً، لكنَّهُ
تَاجاً لِديِـنِهِمَا قَدِ اخْتَارَهُ أَبَوَاهْ.
فَبُورِكَ عِيدُهُ المَاسِيُّ وِلاَدَة ً
ومَاسَةً أُخْرَى يَرْجُو لَهُ أَخَوَاهْ!
***
مع تحيات
نذر الله نزار وشهلاخان مراد علي
دوشنبيه، 2/12/2022
 
 
 
БА ДР. ТОҶИДДИН МАРДОНӢ
ба муносибати ҷашни алмосии зодрӯзи 75
(тарҷумаи таҳтуллафзи шеър аз забони арабӣ)
 
Ҷавонмардест бо фазилатҳои дерину навин,
Боло рафт ба зинапояи шукуҳ, то аз дигарон бартар шуд.
Ба назм наомад ба риштаи дипломатия муддатҳо,
Магар дар заминаи пурфайз, ки бо илм обаш дод.
Басо тоҷҳо зеби саранд, вале ӯ
Тоҷест, ки волидайн барои динашон баргузидаанд.
Муборак бод ҷашни алмосии мавлуд, боз барои ӯ
Як алмосии дигарро ин додару хоҳараш хоҳонанд.
 
Бо арзи эҳтиром,
 
Назруллоҳи Назар
Шаҳлохон Муродалӣ
 
Душанбе, 02.12.2022
Муфассал ...
Хондан 39 маротиба
Баҳодиҳии мавод
(0 Овозҳо)

СИПОСНОМАИ МУДИРИЯТИ ИНСТИТУТИ ОМӮЗИШИ МАСЪАЛАҲОИ ДАВЛАТҲОИ ОСИЁ ВА АВРУПОИ АКАДЕМИЯИ МИЛЛИИ ИЛМҲОИ ТОҶИКИСТОН БА ИФТИХОРИ 75-УМИН СОЛРӮЗИ ДОКТОРИ ИЛМҲОИ ФИЛОЛОГӢ, ПРОФЕССОР ТОҶИДДИН МАРДОНӢ

  Устоди арҷманд, профессор Тоҷиддин Мардонӣ,
 
  Шумо солиёни дарозест, ки ба кори фикрӣ иштиғол варзида, дар муҳит ва ҳавзаҳои фикрию мадании миллӣ ба сифати шахсияти матраҳи илмӣ соҳибэҳтиром гардидаед. Муҳимтар аз ҳама, Шумо ҳамчун ховаршиноси номии миллию минтақавӣ дар муаррифии шоистаю боистаи равияи вежаи адабиёти дузабона муваффақият касб карда, миёни доираҳои илмию фаннии ватанию хориҷӣ мақом ва ҷойгоҳи муносиб дарёфтаед. Аҳли илму адаби ватанӣ ва доираи васеи хонандагони дохилию хориҷӣ аз мазмуну муҳтавои мероси таҳқиқии Шумо, минҷумла китобу рисола ва монографияҳои ихтисосии “Дузабонии арабию тоҷикӣ дар шеъри асрҳои 1Х-Х” (Душанбе: Маориф, 1993. -165 с.), “Носири Хусрав ва адабиёти арабзабон” (-Душанбе, 2005), “Шеъри Ибни Сино ба забони арабӣ” (Душанбе: Ирфон, 2006. -126 с.), “Равобити адабии халқҳои арабу тоҷик” (-Душанбе: Ирфон, 2006. -400 с.), “Саҳифаҳое аз равобити адабии Арабу Аҷам” (-Душанбе: Ирфон, 2010. -233 с.), “Рӯдакӣ ва адабиёти араб” (-Душанбе: Ирфон, 2010. -128 с.), “Таъсири шеъри арабӣ ба эҷодиёти шоирони форсу тоҷики асрҳои Х1-Х11” (-Душанбе: “Дониш”, 2020. -380 с.), “Влияние арабской поэзии на творчество персидско-таджикских поэтов Х1-Х11 вв.” (-Душанбе: “Дониш”, 2020. -382 стр.) ва амсоли инҳо хуб огоҳанд. Аз ин ҷост, ки силсилапажӯҳишҳои илмию ихтисосии Шумо дар омӯзишу таҳқиқи адабиёти дузабона ва равобити адабии арабу Аҷам барои доираи васеи хонандагону муҳаққиқон ҳамчун сарчашмаи муътамади илмӣ ва таҳқиқӣ хидмат мекунанд. Махсусан, таҳқиқоти академии Шумо дар робита бо таъсири шеъри арабӣ ба ашъори шоирони маъруфи асрҳои Х1-Х11, ки ба забони русӣ таҳти унвони “Влияние арабской поэзии на творчество персидско-таджикских поэтов Х1-Х11 вв.” (-Душанбе: “Дониш”, 2020) интишор гардидааст, дар байни ҷомеаи академию мадании миллӣ ҳамовозӣ пайдо кардааст. 
  Ба ин тартиб, Шумо дар баробари доштани вежагиҳои мунҳасир ба фарди ахлоқӣ, иҷтимоӣ, эҷодӣ, фарҳангӣ ва адабӣ, аз махсусиёти ихтисосӣ – дар сатҳи илмӣ-академӣ донистани забонҳои арабӣ, русӣ ва тоҷикӣ бархурдоред. Воқеан, кам касонеро аз ҷумлаи ховаршиносони маъруфи ватанӣ метавон пайдо кард, ки забонҳои арабию русиро дар сатҳи академӣ дониста бошад. Ин аст, ки Шумо на танҳо дар ҳавзаҳои фикрию илмии тоҷик, балки дар муҳитҳои шарқшиносии минтақавӣ ва русӣ низ ба унвони шахсияти матраҳи илмӣ эътибору эҳтиром доред.
 
  Устод Тоҷиддин Мардонӣ,

  Дар баробари омӯзишу таҳқиқи бардавом, Шумо, ҳамчунин солҳо вазифаи пурмасъули Сафири фавқулода ва мухтори Ҷумҳурии Тоҷикистон дар Ҷумҳуриҳои Туркманистон ва Ӯзбекистонро низ бар дӯш гирифта, аз тариқи кору фаъолияти дипломатӣ дар таҳкими равобити ҳасанаи мутақобила ва тақвияти сиёсати хориҷии Ҳукумати Ҷумҳурии Тоҷикистон саҳми арзанда гузоштаед. Ин аст, ки ҳайати кормандони Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон хидматҳои бедареғи Шуморо дар самти ховаршиносии ватанӣ ва дипломатияи миллӣ қадр мекунанд ва аз ҳамкории судманду самаранокатон эҳтироман арзи сипос менамоянд.
  Бо таваҷҷуҳ ба ин, мудирияти Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон аз фурсати муносиб истифода намуда, 75-умин солгарди умри муборакатонро шодбош гуфта, бароятон саодати умр, сиҳатии комил, неруву тавони илмию эҷодӣ ва беҳтарин хушиҳои зиндагиро таманно менамояд.
 
  Солрӯз фархунда ва хуҷаста, Устоди гиромӣ Тоҷиддин Мардонӣ!
 
Бо эҳтиром,
директори Институти омӯзиши масъалаҳои
давлатҳои Осиё ва Аврупои Академияи миллии
илмҳои Тоҷикистон                                                 Ёрмаҳмад Ниёзӣ

1 декабри соли 2022
Муфассал ...
Хондан 66 маротиба
Баҳодиҳии мавод
(0 Овозҳо)
 
http://www.zoofirma.ru/